თბილისის მერიის მხარდაჭერით, 2025 წლის 16 ივნისიდან - 20 ივნისამდე, ბორჯომში ტარდება „ციფრული საზაფხულო ბანაკი“, რომელიც ორგანიზებულია სასწავლო ცენტრ ედუსითის მიერ და განკუთვნილია 14-17 წლის მოზარდებისთვის. 4-დღიანი ბანაკი გაიმართება ბორჯომში კერძოდ სასტუმრო "Eco Hotel Mzetamze"-ში და მასში მონაწილეობას მიიღებს სამოტივაციო წერილით შერჩეული 30 მოზარდი, რომელთაც საინტერესო, აქტიური და მრავალფეროვანი პროგრამა ელოდებათ.

ბანაკის მიზანია მონაწილეებს გააცნოს ციფრული ტექნოლოგიების სამყარო და ხელი შეუწყოს მათ პროფესიულ ორიენტაციასა და სამომავლო კარიერულ განვითარებას.

ბანაკის დღის განრიგი ისეა დაგეგმილი, რომ ბავშვებს ჰქონდეთ ბალანსი სწავლასა და გართობას შორის — დილიდან დაგეგმილია ინტერაქციული ლექციები და შემეცნებითი აქტივობები ციფრულ პროფესიებზე, ხოლო დღის მეორე ნახევარი მიეძღვნება თამაშებს, სპორტულ ღონისძიებებს, გუნდურ ვორქშოფებსა და შემოქმედებით დავალებებს. ყოველი დღე სრულდება სახალისო აქტივობებით, რაც ხელს უწყობს მონაწილეთა გუნდურობას.

ბანაკის მონაწილეები გაეცნობიან ისეთ თემებს, როგორიცაა: ციფრული დიზაინი და ვიზუალური კომუნიკაცია, ვებპროგრამირება და კოდირების საფუძვლები, ტექნოლოგიური ინოვაციები და სტარტაპ იდეების გენერაცია, სამომავლო პროფესიების გააზრება და ციფრული უნარების განვითარება.

პროექტი სრულად დაფინანსებულია ქალაქ თბილისის მუნიციპალიტეტის მერიის მიერ.

დარეგისტრირდით შემდეგნაირად:

14-15 წლის მონაწილეებმა: გთხოვთ შეავსოთ აღნიშნული ბმული https://forms.gle/z2fL8A5NoSZhDZEt5

16-17 წლის მონაწილეებმა: გაიარეთ რეგისტრაცია საიტზე youthtbilisi.ge