პროექტი "სსპმ – საჯარო მმართველობის სკოლა“ არის 5-დღიანი ინტენსიური არაფორმალური საგანმანათლებლო პროგრამა, რომელიც ტარდება დაბა ბაკურიანში და განკუთვნილია 45 მოტივირებული ახალგაზრდა მონაწილისთვის თბილისიდან. სკოლის მიზანია ახალგაზრდებში საჯარო მმართველობის ძირითადი პრინციპების, სახელმწიფოს ინსტიტუციური მოწყობის, გადაწყვეტილების მიღების პროცესების და დემოკრატიული ჩართულობის მნიშვნელობის გაცნობიერება.

პროგრამა ეფუძნება არაფორმალური განათლების მეთოდოლოგიას და აერთიანებს ინტერაქციულ სესიებს, საჯარო გამოსვლის ვორქშოფებს, მოდელირებას სახელმწიფო სტრუქტურების მუშაობაზე, გუნდურ საქმიანობასა და კულტურულ-შემეცნებით აქტივობებს. მონაწილეები სამომავლო ლიდერობისთვის საჭირო უნარებს განივითარებენ რეალურ პრობლემებზე მუშაობით, დისკუსიებით და დილემებზე დაფუძნებული სწავლებით.

პროექტის საბანაკე ნაწილის განხორციელების ვადებად მოიაზრება თებერვლის მე-2, მე-3, კვირები (15-20 თებერვალი). მონაწილეობის მსურველთათვის რეგისტრაციის დასაწყისი განისაზღვრება მიმდინარე წლის 10 დეკემბრიდან. სააპლიკაციო ფორმა განთავსებული იქნება თბილისის სპორტისა და ახალგაზრდობის ცენტრის ოფიციალურ ვებ-გვერდზე (https://youthtbilisi.ge/).

პროექტი უზრუნველყოფს ახალგაზრდების ჰოლისტურ განვითარებას: ისინი გაიღრმავებენ ცოდნას სახელმწიფო მმართველობის სფეროში, გაიუმჯობესებენ კრიტიკული აზროვნების, კომუნიკაციისა და გადაწყვეტილების მიღების უნარებს, ხოლო მოწვეული ტრენერები მათ გაუზიარებენ პრაქტიკულ გამოცდილებას.

"სსპმ – საჯარო მმართველობის სკოლა“ ხელს უწყობს ახალგაზრდების სამოქალაქო ცნობიერების ამაღლებას, სახელმწიფო ინსტიტუტების მუშაობის უკეთ გააზრებასა და მომავალი ლიდერების ჩამოყალიბებას, რომლებიც აქტიურად შეიტანენ წვლილს ქვეყნის განვითარებაში.